Cospeito é o corazón da Terra Chá, coa implantación da administración 100% electrónica xa en marcha, e á vez grazas en gran medida ás súas feiras. A Feira da Maquinaria Usada e Artesanía que tamén inclúe antigüidades, unha cita que demostra, coa visita de milleiros de curiosos en cada nova edición, que o gran motor económico do municipio é a gandería, un sector que  dá ocupación a preto do 80% da poboación activa. Vacas e porcos son o medio de sustento de moitos  dos seus veciños, por iso, outra das feiras máis importantes para o avance necesario de Cospeito é a do Porco da Ceba (o último domingo de novembro), que xa pasou con éxito as súas  vodas de prata  no 2013. A Mostra  Exposición de Muimenta  (Moexmu), como é lóxico, é outro dos pratos fortes deste municipio. Este evento, que mantén o único concurso de gando  de toda a provincia,  xa cumpriu 30 primaveiras no 2014, coa forza  que lle imprimen os seus  veciños, que pese ao paso do tempo seguen mantendo a mesma  ilusión dos comezos. Aparellada a esta feira, e co fin inicial de recadar fondos para ela, naceu a Festa  da Filloa, que hoxe en día  xa é, de   maneira independente, unha cita máis no calendario festivo da vila.

O humidal Parga-Ladra-Támoga é un Lugar de Interese Coumunitario, formado por unha extensa rede fluvial, pequenas lagoas e espazos alagados. Entre as lagoas destaca a de Cospeito. Calquera época é boa para visitala pero o outono e o inverno son especialmente interesantes, dada a presenza das aves migratorias do norte de Europa