A Lei 9/2001, do 21 de agosto, de Conservación da Natureza (DOG nº 171, do 4 de setembro de 2001), no seu Título I, “Dos espazos naturais”, define con carácter xeral os espazos naturais que deben ser considerados merecedores dunha protección especial, regulando o seu procedemento de declaración e dispón un réxime xeral de protección, prevendo a posibilidade de establecer réximes de protección preventiva. A Lei considera oito tipo de espazos naturais, incluíndo dentro da categoría de Zonas de especial protección dos valores naturais, as zonas especiais de conservación que conforman a Rede Natura 2000, creadas ao amparo das directivas DC 92/43/CEE e DC 79/409, e que non posúan outra figura de protección das establecidas nesta lei. A Lei de Conservación da Natureza establece, en concordancia coa lexislación estatal, como instrumentos específicos de ordenación ambiental os Plans de Ordenación dos Recursos Naturais, os Plans Reitor de Uso e Xestión e os Plans de Conservación. A inclusión e declaración do LIC Parga-Ladra-Támoga como candidato a forma parte da Rede Natura 2000, tivo por obxecto protexer a integridade dos seus ecosistemas, contribuír á protección, recuperación, fomento e difusión dos seus valores culturais, facilitar o coñecemento e o goce dos cidadáns, promover un desenvolvemento social, económico e cultural para comunidades do seu ámbito territorial, e achegar ao patrimonio nacional, europeo e mundial unha mostra representativa de diversos tipos de humidais lacunares, aluviales e riparios, xunto cun importante elenco de especies acuáticas e hidrófitas. A finalidade do presente plan é a de establecer un modelo de xestión que contribúa a alcanzar os obxectivos de conservación e ordenación do Espazo Natural Parga-Ladra-Támoga de acordo cos criterios establecidos nas normativas que rexen a xestión dos Espazos Naturais e da Biodiversidade, a nivel comunitario, nacional e autonómico.

O Espazo Natural Parga-Ladra-Támoga (ES1120003) ocupa unha superficie de máis de 4.900 ha, incluídas na provincia de Lugo e distribuída entre os termos municipais de: Abadín, Begonte, Castro de Rei, Cospeito, Friol, Guitiriz, Lugo, Outeiro de Rei, Rábade, Vilalba e Xermade, termos municipais que en conxunto constitúen a Zona de influencia socio-económica do presente plan, mentres que desde o ámbito da análise e valoración dos compoñentes de medio físico e biótico que inciden no Espazo Natural Parga-Ladra-Támoga, utilizouse como unidade ambiental de referencia a Conca Alta do río Miño ou Alto Miño. O Espazo Natural Parga-Ladra-Támoga inclúe os tramos fluviais de maior orde xerárquica presentes na zona media e baixa da Conca Alta do río Miño, estendéndose desde os cursos fluviais por pequenas superficies configuradas por diversos tipos de humidais, bosques mesófilos e paisaxes agrícolas tradicionais.